Para sa Aking First Love

Dear First Love,

          Bata pa lang ako, nandyan ka na. Sinasamahan ako sa kung saan-saan, bumibili ng pagkain para ipaglaro ako ng mga pinsan at kapitbahay, sinasamahan ako sa banyo kapag pupupu, partner ko sa field trip, at binubuhat ako sa likod kapag pagod na ko. Sa paglaki ko, nariyan ka pa rin. Walang sawang naghahatid at sumusundo sa akin, sumusuporta sa mga kalokohan ko, nagsasabing 'okay lang' kapag may nabagsak akong exam, nagpapakain sa akin kahit madalas pang-dalawang tao ang order ko, at minsan, binubuhat pa rin ako sa likod kapag ayaw kong mabasa ang mga paa ko ng baha. Ikaw rin ang laging kasama sa mga ultimate adventures. Sa'yo ko natuto mag-camping sa bundok, matulog sa tabi ng dagat, kumain ng mami at goto sa daan, uminom ng tubig mula sa bukal, at kung anu-ano pa.

          Ikaw siguro ang pinaka-corny at nakakatawang tao na kilala ko. Hindi lang ako ang napapatawa mo kundi ang marami pang tao na sa'yo ay laging nakapaligid. Sa'yo ko marahil natutunan kung paano tumawa, kung paano ngumiti kahit malungkot, kung paano mabuhay nang masaya sa kabila ng problema. Ikaw din ang nagturo sa akin na magpahalaga sa mga taong malapit at nagmamahal sa akin.

          Iba-iba man siguro kayo sa buong mundo, pero maswerte ako na ika'y naging akin. Tila ba pandesal lang ang hiningi ko ngunit binigyan ako ng burger, 1 pound pa with large fries and drinks! Salamat sa lahat ng masasayang alaala. Ikaw ang aking first and forever love.

            Happy Father's Day~